نحو التجديد

 الشعر التالي و جدته على أحد المواقع, ورغم أنني لست من مؤيدي العامية فقد أعجبني بس مش عارف هو بتاع مين, هل أحد من القراء يعرف هو بتاع مين؟؟

يا شعبى ياحبيبي يا روحى يا بيبى...... يا حطك فى جيبى يا بن الحلال
ياشعبى يا شاطر يا جابر خواطر .......يا ساكن مقابر وصابر وعال

يا واكل سمومك يا بايع هدومك ......يا حامل همومك وشايل جبال
يا شعبى اللى نايم وسارح وهايم... ..وفى الفقر عايم وحالك دا حال

احبك محشش مفرفش مطنش.......... ودايخ مدروخ واخر انسطال
احبك مكبر دماغك مخدر................ ممشى امورك كده بإتكال
واحب اللى ينصب واحب اللى يكدب واحب اللى ينهب ويسرق تلال

واحب اللى شايف وعارف وخايف........ وبالع لسانه وكاتم ما قال
واحب اللى قافل عيونه المغفل ............واحب البهايم واحب البغال
واحب اللى راضى واحب اللى فاضى واحب اللى عايز يربى العيال

واحب اللى يائس واحب اللى بائس واحب اللى محبط وشايف محال
واحبك تسافر وتبعد تهاجر ........وتبعت فلوسك دولار او ريال
واحبك تطبل تهلل تهبل عشان ...........ماتش كوره وفيلم ومقال
واحبك تؤيد تعضد تمجد ..........توافق تنافق وتلحس نعال
تحضر نشادر تجمع كوار................ تلمع تأمع تظبط مجال
لكن لو تفكر تخطط تقرر.......... تشغللى مخك وتفتح جدال

وتبدأ تشاكل وتعمل مشاكل ........وتنكش مسائل وتسأل سؤال

وعايز تنور وعايز تطور ..........وتعمللى روحك مفرد رجال

ساعتها هاجيبك لا يمكن اسيبك ........وراح تبقى عبره وتصبح مثال

هابهدل جنابك واذل اللى جابك .....وهيكون عذابك دا فوق الاحتمال

وامرمط سعادتك واهزأ سيادتك .......واخللى كرامتك فى حالة هزال

وتلبس قضيه وتصبح رزيه ........وباقى حياتك تعيش فى انعزال

هتقبل هاحبك ها ترفض هلبك .......هتطلع هاتنزل هاجبلك جمال